पुणे :
आगामी पुणे महानगरपालिका निवडणुकीच्या पार्श्वभूमीवर शहरातील राजकारणाला वेग आला असून, सोमवारी घडलेल्या एका मोठ्या घडामोडीने सर्वच राजकीय आघाड्यांना धक्का बसला आहे. उमेदवारी अर्ज भरण्याची प्रक्रिया सुरू असतानाच भाजप, काँग्रेस, मनसे तसेच शिवसेनेच्या दोन्ही गटांतील नऊ माजी नगरसेवकांनी आपापल्या पक्षांना सोडचिठ्ठी देत उपमुख्यमंत्री अजित पवार यांच्या राष्ट्रवादी काँग्रेसमध्ये प्रवेश केला आहे. या प्रवेशामुळे पुण्यातील निवडणुकीची समीकरणे बदलण्याची शक्यता व्यक्त होत आहे.
भिन्न पक्षांतील नेत्यांची एकत्रित वाटचाल
भाजपचे धनंजय जाधव, मुकारी अलगुडे, शंकर पवार आणि मधुकर मुसळे, काँग्रेसचे दत्ता बहिरट, मनसेचे जयराज लांडगे, शिवसेना ठाकरे गटाच्या नीता मांजळकर, मुख्यमंत्री एकनाथ शिंदे यांच्या शिवसेनेचे आनंद मांजळकर तसेच शरद पवार गटाचे स्वप्निल दुधाने यांनी अजित पवार यांच्या नेतृत्वावर विश्वास दाखवत राष्ट्रवादी काँग्रेसमध्ये प्रवेश केला.
प्रभागनिहाय राजकीय गणिते बदलण्याची शक्यता
या सर्व नेत्यांचा प्रभाव वेगवेगळ्या प्रभागांमध्ये असून, त्यांच्या प्रवेशामुळे अनेक ठिकाणी स्थानिक राजकीय समीकरणे नव्याने जुळण्याची शक्यता आहे. महापालिकेतील सत्ता मिळवण्यासाठी अजित पवार गटाने आक्रमक पवित्रा घेतल्याचे या घडामोडीतून स्पष्ट होत आहे.
दरम्यान, पुणे शहरात अजित पवार गट आणि शरद पवार गट यांच्यात झालेल्या युतीच्या पार्श्वभूमीवर या नव्या प्रवेशांमुळे आगामी महापालिका निवडणूक अधिकच चुरशीची ठरणार असल्याचे राजकीय विश्लेषकांचे मत आहे.
