पुणे :
शहराच्या मध्यवर्ती भागातील शनिवार पेठ–महात्मा फुले मंडई परिसराचा समावेश असलेल्या प्रभाग क्रमांक २५ मध्ये यंदाच्या महापालिका निवडणुकीत राजकीय घराण्यांच्या पुढील पिढीला संधी देण्यावर भर दिसून येत आहे. भारतीय जनता पक्षाने या प्रभागातून तरुण आणि उच्चशिक्षित उमेदवारांना उमेदवारी देत पिढीबदलाचा स्पष्ट संकेत दिला आहे.
भाजपकडून दिवंगत खासदार व माजी मंत्री गिरीश बापट यांच्या सून स्वरदा बापट, दिवंगत आमदार रमेश वांजळे यांच्या कन्या सायली वांजळे, दिवंगत आमदार मुक्ता टिळक यांचे पुत्र कुणाल टिळक, माजी आमदार विनायक निम्हण यांचे पुत्र चंद्रशेखर निम्हण, माजी राज्यमंत्री शशिकांत सुतार यांचे पुत्र पृथ्वीराज सुतार तसेच बाळासाहेब शिवरकर यांचे चिरंजीव अभिजीत शिवरकर यांना निवडणुकीच्या रिंगणात उतरवण्यात आले आहे.
दरम्यान, इतर राजकीय पक्षांनीही हाच मार्ग अवलंबत माजी राज्यमंत्री रमेश बागवे यांचे पुत्र अविनाश बागवे, माजी आमदार रवींद्र धंगेकर, महादेव बाबर यांच्या मुलांसह वडगाव शेरी विधानसभा मतदारसंघाचे विद्यमान आमदार बापू पठारे यांच्या कुटुंबातील सदस्यांना उमेदवारी दिली आहे. त्यामुळे या प्रभागात ‘नव्या चेहऱ्यांची’ चुरस अधिक रंगतदार होणार आहे.
भाजपच्या उमेदवार स्वरदा बापट या एलएलएम पदवीधर असून त्यांनी कोल्हापूरच्या शिवाजी विद्यापीठातून शिक्षण पूर्ण केले आहे. पुणे महापालिकेची निवडणूक त्या प्रथमच लढवीत असल्या तरी यापूर्वी सांगली महापालिकेच्या निवडणुकीचा अनुभव त्यांच्याकडे आहे. त्यांच्या उमेदवारी अर्जानुसार त्यांची एकूण मालमत्ता ११ कोटी २२ लाख रुपयांहून अधिक असून त्यांच्यावर कोणताही गुन्हा दाखल नाही.
कसबा विधानसभा मतदारसंघातील दिवंगत आमदार मुक्ता टिळक यांचे पुत्र कुणाल टिळक हे ३२ वर्षांचे असून त्यांनी परदेशातून कायद्याचे उच्च शिक्षण घेतले आहे. त्यांच्याकडेही एकही गुन्हेगारी नोंद नसल्याचे जाहीरनाम्यात नमूद आहे.
या सर्व उमेदवारांमध्ये आमदार बापू पठारे यांचे पुत्र सुरेंद्र पठारे यांची मालमत्ता आणि वाहनसंपत्ती सर्वाधिक असल्याचे दिसून येते. बी.टेक. शिक्षण घेतलेल्या सुरेंद्र पठारे यांच्याकडे बीएमडब्ल्यू, मर्सिडीज आणि इनोव्हा क्रिस्टा अशी महागडी वाहने आहेत.
एकूणच, प्रभाग क्रमांक २५ मध्ये राजकीय वारसा, तरुण नेतृत्व आणि संपत्तीच्या मुद्द्यांवर यंदाची निवडणूक लक्षवेधी ठरण्याची चिन्हे दिसत आहेत.
